Schooljahr 2022/ 2023
Juni 2023
Musik in d‘ Ludgeri Kark
Uns Musikerklasse 4 dürs weer Musik maken. Disse Mal in de Ludgeri Kark in Nörden. Daar het an Sönndag dat Polizeiorchester van Nedersassen een Konzert geven un wi sünd inladen west to’n Anfang twee Stücken to spölen.
De Musikers hebben düchtig wat to doon: Dat Konzert in de Oberschule, een Uptritt in de Kark un in twee Week spölen se in de Park van dat Schlöss in Lütsbörg bi de Schlosspark Serenade. Büst du in de 2. Klasse? Denn komm doch rum un hör di dat an, wat de Kinner all spölen können. De Schölers un Schölerskes ut de 2. Klassen können (mutten) sük nämlich nu entscheden of se ok mitdoon willen un sük denn för de Bläserklasse anmelden.
Schoolfest
So een bunten Freedag Namiddag sücht man in uns School ok neet so faak. Schoolfest in ‚t Spiet un all sünd se komen: Schölers mit hör Ollen, Süsters un Bröörs, Mesters un all annern, de in de School arbeiden. Sogaar Mesterskes un Schölers van fröher sünd seh’n worden.
De Ollen ut de Klassen 1 bit 4 hebben daarför sörgt, dat dat genoog to eten un to drinken geev: Lecker Kook un Waffels, Koffje of Water, Braadwursten. Daar weer haast nichts, wat dat neet geev. De Kinner hebben vördeem wat torecht klütert of Spillen vörbereidt, so dat keeneen Langwiel hebben muss.
April 2023
Paasken!
Wi freien uns all düchtig. In de Klassen word düchtig maalt un klütert. Einig Klassen backen Oosterhasen of farven Oostereier.
Määrt 2023
Wi hollen uns Stadt schoon!
Dat Weer weer leider neet so mooi, dat weer gries un fuchtig. Man wi wullen uns Bidrag leisten un wat för de Umwelt doon un so sünd wi trotzdem lostrucken. Handskes an, Müllsacken her un los gung dat. Wunnert hebben wi uns: Well smitt denn sien Müll eenfach so in de Gegend rum? Van allens weer wat daarbi: Papier un Plastik, Buddels un sogar Teppichresten.
Probentied
De Musikerkinner ut de 4. Klassen hebben an Saterdag in d’School west un Musik maakt. Tosamen mit Musikers, de richtig good Trompeet of Posaune spölen können, hebben se twee neije Stücken instudeert. Disse Stücken willen uns Kinner tosamen mit dat Chaos-Orchester van dat Stadtorchester Nörden up en Konzert spölen. Wenn ji dat hören willen, denn kommt an de 13. Mai to dat Konzert in de Oberschule Nörden. Ook up de Schlossparkserendat in Lütsbörg in Juni können ji uns Musikerkinner sehn un hören.
Februar 2023
Fiete Hering
Uns 2. Klassen hebben Boken schunken kregen. All Kinner hebben dat Bookk „Fiete Hering“ kregen. In dat Book geiht dat um en Fisk, de Abenteuers in de See belevt. Dat wordt för de lüttje Fiete Hering ok düchtig gefahrelk: he trefft en Hai, de Minsken willen hum fangen un denn is daar ja ok noch en Barg van Schiet un Strunt, de neet in de See hört. Good, dat Fiete up sien Reis ok Frünnen finnen deit. Mitnanner sallen se woll all Problemen lösen.
Wi lesen platt!
De Winners van uns plattdüütske Leeswettstried – Seljatin un Finn – dürsen nu an de tweede Stufe van dat Plattdüütske Lesen, de Kreisentscheid, deelnehmen. De Wettstried weer in de KGS in Hage un daar kwemen Kinnder un junge Lüü (Klasse 3 bit 13) ut de heele Umkreis tosamen. Se mussen vör een Jury un hör Ollen, Grootollen of Frünnen vörlesen. Dat weet düchtig upregend! Mitmaakt hebben Schölers of Schölerkes ut Upgant-Schott, Leezdörp, Berumerfehn, Münkeboe un Finn un Seljatin ut Nörden.
Dezember 2022
Leeswettbewerb up Platt
Twee Schölers hebben an de plattdüütske Leeswettbewerb deelnommen. Seljatin un Finn hebben beide en Text vörlesen. De Jury, dree Mesterskes ut uns School, hett sük dat anhört un kunn heel neet so recht seggen, well van de beiden dat nu better maakt hett.
Nu gifft dat bi uns an de School in disse Jahr twee Winners! Heel wat besünners.
Viellicht maakst du bi de kommende Leeswettbewerb ja ok mit?
November 2022
Mien lüttje Lateern
Mien lüttje Lateern, ik hebb di so geern.
Du danzt döör de Straten, du kannst dat neet laten,
ik mutt mit di lopen, mutt singen un ropen:
Mien lüttje Lateern, ik hebb di so geern.
Mien lüttje Lateern, ik hebb di so geern.
Du, Wind, laat dat Susen, kruup achter de Husen,
kruup achter de Dieken, vandaag musst du wieken.
Mien lüttje Lateern, ik hebb di so geern.
Mien lüttje Lateern
Mien lüttje Lateern, ik hebb di so geern.
Du danzt döör de Straten, du kannst dat neet laten,
ik mutt mit di lopen, mutt singen un ropen:
Mien lüttje Lateern, ik hebb di so geern.
Mien lüttje Lateern, ik hebb di so geern.
Du, Wind, laat dat Susen, kruup achter de Husen,
kruup achter de Dieken, vandaag musst du wieken.
Mien lüttje Lateern, ik hebb di so geern.
Mien lüttje Lateern, du gleihst as en Stern.
Dor tinkelt keen Mantje, dor kreiht uns keen Hahntje,
Danz wieder, danz wieder, ik sing immer blieder:
Mien lüttje Lateern, ik hebb di so geern.
Oktober 2022
Pottkiekers
5 Schölers van de BBS hebben mit uns Kinner ut de 3. un 4. Klassen verscheden Rezepten van dat Projekt „Töpfe der Welt“ utprobeert. Mitnanner hebben se türkisch, libanesisch un ostfreesk kookt un backen.
September 2022
Uns Schoolhoff
Toeerst wordt uns Scholhoff bunt. Un denn kommen ok noch neje Spölsaken daarto! Mit de Sponsorenloop in d‘ Sömmer hebben de Kinner 2.500€ insammelt. Van dat Geld hebben wi de Blömen för dat „Spiet-Hartje“ köfft, aber ok Spööltüch för buten. En bietje Geld hebben wi noch. Mal eben sehn, wat daarvan noch mooies köfft worden kann. Uns Schoolhoff sall ja noch moijer un de Pausen noch lüstiger worden.
Müllplatz
De 4. Klassen hebben de Müllplatz in Grootfehn besöcht. Hier kummt all de Offall hen, de wi in uns blau, geel, swart of gröön Tünnen smieten. Weten ji egentlik, wo de Offall richtig sorteert wordt? Da sünd de Kinner daar ok gewahr worden.
Andrea Reitmeyer leest vör
Karl Kunterbunt – En Chamäleon wiest Farv
Dat Book hett noch een grote Besünnerheid: De Text is neet alleen in Hochdüütsk schreven, man ok in uns ostfreeske Platt! Froo Reitmeyer hett darum hör Geschicht eerst mal up Platt vörlesen un denn tosamen mit de Kinnder de Text översett. Denn hett se de hochdüütske Text vörlesen, denn jedereen sull an ‚t Enn natürelk de Geschicht verstaan können.
August 2022
Musik
Trumpeet, Posaun un dat groot Hoorn (dat Euphonium, wi nömen dat de „Knuddelbär“) – all disse Instrumenten klungen Saterdag döör uns School. De Musikers ut uns 4. Klassen hebbebn sük truffen um mit Profis (dat sünd Musikers van dat Nörder Stadtorchester) to öven. Wat sallen wi daarto seggen? Dat hett heel wunnerbar west! Groten Dank an all uns Profis: De Kinner sünd een good Tree vörut komen. Wi hopen, dat jo de dag ook Spaß makt hett!
De eerste Schooldag
Dönnerdag, Freedag un Saterdag hebben wi uns neje Schoolwichter un -jungs bi uns in de School begrött. Mit hör Ollen, Grootollen un Frünnen sünd se in de Aula van Froo Brede un de Mesterskes upnahmen worden. Ook Kari un Bu (ut uns Leesbook) un de hör Frünnen sünd daarbi west. De Kinner sünd denn in de Klassenruum gahn, de Groten kunnen in de Tied up de Schoolhoff Koffje drinken un sük de School ankieken.
—————————————————————————————————————
Schooljahr 2021/ 2022
Mai 2022
Bruudpaden leggen
Wi hebben mit 29 Schölers ut all 4 Klassenstufen Blömen sammelt und Bruudpaden leggt.
Dat Leggen van Bruudpaden is een Tradition, de besünner in un um Nörden bekannt is.
Wi sünd uns nu seker: Traditionen sünd neet to „stuur“ för de Kinner ut de 1. Klassen un ook neet to „kindsk“ för de Groten ut de 4. Klassen. De Kinner hebben Biller van Hartjes, Schippen, Filappers, … leggt. Aver ook uns School-Boom mit dat Hartje in de Stamm un uns plattdüütske „Moin“ düren natürelk neet fehlen.
Plattdütske School
Middeweek, 11.5.2022, sünd wi mit dree Kinner ut de Klasse 4b un twee Mesters na Lünbörg fahren um een heel besünner Utteken antonehmen. Uns Kultusminister Herr Tonne hett 17 Scholen ut Nedersassen as „Plattdütske School“ uttekent. Um 7.46h sünd wi mit de Iesenbahn losfahren. In Bremen un in Hambörg mussen wi umstiegen. Kört vör 13.00h sünd wi in Lünbörg ankommen. Erst geev dat een bietje wat to Eeten und Drinken, denn geev dat de Urkunn un een mooi Schild för uns School-Ingangsdöör. Achterann hebben wi uns Lünbörg ankeken, lecker Ies eten un denn sünd wi mit de Iesenbahn torüg na Huus fahren. In Bremen hebben wi haast uns Zug verpasst! Um 20.06h sünd wi pünktlich weer in Nörden ankommen.
Kiek in mien Pott
Wat eten uns Mitschölers ut anner Lannen an’t Leevsten? Na een körte Tied sünd all düchtig vööl Rezepten ofgeven worden. Dat een of anner Eten hebben wi nu all kokt of backt – smakelk!!!
April 2022
De Maiboom steiht
Wi hebben uns Maiboom upstellt un dat bi good Weer heel düchtig fiert! De Musik weer good un luud, dat Eten smakelk. So kann de Sömmer wiedergahn.
Een Haart bi de Ingang
Dat Haartje ut Tulpen bleiht! Sücht dat neet good ut?
Wi wünsken all Schölers un hör Familien fein Feerjen un mooi Fierdagen.
Februar 2022
100 Dagen sünd de Lüttjen nu all in de School. Se hebben ook all ’n heel bült lernt un hebben sük de Jubiläumsfier woll verdeent.
De Blömen an de Boog hebben se sülvst maakt un so ook ostfreesk Bruukdoom kennenlehrt.
De Polizeipuppenbühn kummt
Bruno mutt de Straat överqueren. Wo maakt he dat bloot?
Links kieken – rechts kieken – links kieken. Wenn all Autos stahnblieven, denn kann dat losgahn. Un up dat Rad de Fahrradhelm neet vergeten!
Januar 2022
Ofscheed nehmen
De lüttje Keerl Wilje hett düchtig Unsinn dreven. In jede Klassenzimmer hett he sien Ofscheed fiert un sück een bietje wat „malls“ infallen laten: hier fehlen de Stohlen, door gifft dat arige Schoolfacken up de Stünnenplan… Nu geiht he weer up grote Reis un kummt hopentlik anner November torüch um bi uns up de Schoolhoff to wohnen.
Plattdüütsk in d‘ Januarmaant
Wiel wi immer noch nichts „richtiges“ mitnanner maken düren, sammeln wi all för uns alleen* – an ‚t Enn wordt dat dann tosammen brocht un wi hebben (hopentlik) een kumpleet Platt ABC.
*Ollen, Grootollen un Frünnen können seker helpen
Thema: In d‘ School/ Rund um d‘ School
A ___
B ___ Book (Buch)
C ___
…
U ___ Unnericht (Unterricht)
…
XYZ ___
Wi koken nu „in bunt“!
In de Köken hebben wi nu Gereedskuppen in verscheden Farven. Jede Kockeck hett sien egen Farv. So sall dat mit dat uprümen eenfacher wesen. Of dat stimmt?
November 2021
Bunt sünd Busk un Bomen
Bunt sünd Busk un Bomen,
Harvsttied is nu komen,
geel is’t Stoppelfeld.
Bunte Bladen weihen,
lesde Blömen bleihen,
koller ward de Welt.
Vögelbej’n un Heide
lüchten wiedhen beide
in all roode Klör’n.
Bunte Draken sweven
an een sünnig Heven,
gröten uns van feern.
Tuffelfüren brannen,
flietig flinke Hannen
hebbt de Tuffels rüddt.
Kranzen heel ut Öhren
hangen över’t Dören.
Elk un een fiert mit.
Fleit hör ik un Geige,
Dag geiht nu to Neige.
Un bi’t Avendrood
Arnteleder klingen.
Junge Lü besingen
Arbeid, Koorn un Brood.
Översett van Karin Steiner 25.10.2011
de-plattsnackers.de
Oktober 2021
Laat mi man lopen
Dat weer dat Thema van een Wettbewerb, för de wi in dat leste Schooljahr mit de Plattdütsk-Klasse een Film dreiht hebben. Un dat Motto passt ook good in disse Harvst!
Na d‘ School lopen, dat hett de Klasse 4a nu fief Weken utprobeert un faststellt, dat dat ook heel good geiht. Un wenn du löppst, denn deist du wat för dien Gesundheit un Fitness, du büst muntzer, wenn du in de School ankommen deist un good för de Umwelt is dat ok noch! Beter geiht dat doch heel neet. Viellicht maken anner mal noch mehr Klassen mit?
Kunstwettstried
Uns School hett een neije Logo un daarum hebben de Schölers in d‘ September mooi bunte Biller van uns Herzboom malt. Up dat Bild können ji de Winner-Biller ut jede Klasse sehen.
To good för de Tünn
To lüttjet of to dünn? To liek of to scheev? Dat is doch all nettgliek, denn smacken deit dat Obst un anner Grööntüüg doch. Daarum maken wi bi uns an de School ut disse „Resten“, de in de Supermarkt neet verköfft worden können/ düren nu lecker Obst-Chips.Dat is düchtig vööl Arbeit (Obst wasken, putzen un snieden, denn mutt dat een Stünn in de Backovend drögen), aber ok düchtig smakelk.
September 2021
Septembermaant is Plattdütskmaant
Dat Motto van de Plattdüütskmaant 2021 is: Uns Wadd. Uns Platt. Uns Oostfreesland!
In Ostfreesland gift dat neet bloot Deren.
Ok dat all höört to Ostfreesland:
das Watt – dat Wadd
das Meer – de See
der Deich – de Diek
die Welle – de Well
der Wind – de Wind
der Sturm – de Störm
die große und hohe Welle – de Bulg oder de Breker
das Schiff – dat Schipp
der Leuchtturm – de Füürtoorn
der Austernfischer – de (of dat) Pastoorke
der Große Brachvogel – Bröör Dirk
die Schnepfe – de Greta
die Silbermöwe – de Kobb/ de Grieskobb (Jungtier)
die Scholle – de But
Wi sünd na Auerk fahren un hebben de Ministerpräsident van Nedersassen truffen. Ministerpräsident Weil weer in Auerk um de Aktion „Freedag is Plattdag“ to stönen.
De 1. Dag in de School
Nu sünd se daar, uns neije Schölers van de Klassen 1a, 1b un 1c un van de Vörschool! An dree Dagen hebben wi up de Schoolhoff een lüttje (immer noch wegen Corona) Begrötens-Fier maakt un de Kinner hebben een erste Stünn Unnerricht hatt.
Wi freien uns düchtig up dat komende School-Jahr un wünsken all Kinner mit hör Familjen een leep good Schooltied!
In disse Schooljahr is de Klasse 1a de „Robben- oder Seehundklasse“, de Klasse 1b is de „Krabbenklasse“ und de Klasse 1c is de „Möwen- oder Lachmöwenklasse“. Dat is Grund genoog, de plattdüütske Namen einiger Watt- undWasserdeeren to leren:
der Seehund – de Seehund
die Robbe – de Rubb
die Krabbe – de Krabb
die Garnele – de Granaat
der Krebs – de Dwarsloper
die Möwe – de Mööv
die Lachmöwe – de Lachmööv
der Wattwurm – de Waddwurm
die Muschel – de Mussel
die Qualle – de Quabb
der Seestern – de Fievfoot
Schooljahr 2020/ 2021
Juli 2021
Fundsachen II
Och nee, Kinner! Waarum vergeten of verlesen ji egentlik all jo Kleer? Dat man maal een Handske to vööl of to minn hett, dat mag ja noch angaan. In d’ Sömmer kann man bi Sünnschien middags ook een Pullover of een Jack vergeten. Aver Winterjacken of Büxen? Turnschoh? Dat is doch sünnerbaar … of hett daar ook uns Wilje Wichtel sien Fingers in d’ Spill?
Juni 2021
Fundsachen
So vööl Kleer sünd in de leste twee Jahren bi un vergeten of verloren worden! De Schapp mit de Fundsaken weer rappelvull. Arig, dat keeneen de Schoh of Jacken, Handskes un Pullovers missen un söken deit…
Football EM
Ok bi uns gifft dat genoog Kinner (un Groten), de sük mit Football utkennt un sük vöör de EM interesseren. Kinner ut de Klasse 1b hebben daarum een Wand bi de Ingangsdöör mit Trikots van de Mannschuppen schmückt. Jede Dag brengen se de List mit de Resultaten van den Footballspölen up de neeiste Stand
Radprüfung
Mit Rad fahren is in Ostfreesland egentlik nichts besünners. Daarmit sük de Kinner ok seker in de Stratenverkehr bewegen können, maken se bi uns in Klasse 3 of 4 een „Radfahrprüfung“. De Polizei helpt uns immer. Hopenlik können so Unfallen up de Straten verhinnert worden.
Musik!
Wi düren weer Musik maken. In buten un mit düchtig vööl Ofstand, aber dat maakt uns nichts ut. Dat wichtigste is, dat wi uns Instrumenten weer vandag halen un spölen können.
Herr Fuhrmann hett de Kinner van de 2. Klassen verklaart, wo dat mit uns Musik-Klasse lopen deit. Hopentlik finnt sük de een of anner, de daarnaast Trumpeet, Posaun of das groot Hoorn spölen mag.
Mai 2021
Plattdüütsk Leeswettstried
Plattdüütsk Klassen gofft dat upstünds neet, un doch hebben sük 29 Kinner ut de darde un veerde Klassen för de Leeswettstried meldt. Ut twee Texten kunnen se sük een utsöken un to Huus dat Lesen öven. An de 27. Mai weer dat denn so wiet. Ut jede Klasse kunnen een of twee Schölers vör een Jury bewiesen wat se können.
All sünd richtig good wets – man winnen kunn bloot een: Marvin ut de Klasse 3a. Wi graleeren heel düchtig!
Bruudpadd leggen
Du bruukst Blömen: Fenntjeblömen (Gänseblümchen), Hunnblömen (Löwenzahn), Botterblömen (Butterblume), Störkeblömen (Wiesenschaumkraut),… All de Blömen, de anner Lüü Unkruud (Unkraut) nömen.
Moss (Moos), Dannappels (Tannenzapfen) un Steenen kannst du ook nehmen. Also all dat, wat du in de Wald un up dat Gröönland finnen kannst.
Blömen ut de Tuun hören neet up een Bruudpadd.
April 2021
Grööntüch
Grööntüch in de Mülltünn? Mit uns neet! De Kinner van de Klasse 3a hebben sük smakelk Rezepten utdocht: Wat können wi mit de Resten van uns School-Obst maken? Rutkomen is daarbi een „Rezeptbuch Spietquetsche“. Un dat kann sogar bi uns köfft worden.
Osterhasen van d‘ Spiet
Uns Schölers hebben weer düchtig an’t Klütern west. Se hebben een Postkaart för Ostern un een Elefant ut Papier maakt. De Elefant kann mit sien Rüssel (een Waskeklammer) Zedelkes of Biller fasthollen. Denn hebben se ok noch een paar Riegen van een plattdüütsken Ostergedicht ofschreven un daarto maalt
Maart 2021
Gummistevelsmieten
Gummistevelsmieten van Nörden bit na Nörderneei. Of dat woll klappen kann. Dat Gymnasium hett Scholen söcht, de daarbi mitmaken. Daar maken wi natürelk geern mit! Een Schöler ut de 3. Klass hett sien Stevel 18,50 m wiet smeten, insgesamt hebben wi mit Kinner ut 4 Klassen all dat Enn van uns School bit na dat Gymnasium schafft – also haast 400 m.
Vögelkes vör de Schütten
In de leste twee Weken hebben wi düchtig an’t Klütern west. Elk un een hett een Duuv of een Piepvögelke ut Papier maakt. Nu hangen mehr as Vögels as een Regenboog an de Schütten vör de School. Dat sücht bannig good ut bi dat gries Kleiweer van disse Wekenend. De Duven sünd een Teken för Hoop un Free un daför, dat wi an uns School all binannerhören. Ook, wenn wi nett neet binanner in de Klassen wesen düren.
Februar 2021
Wilje Wichtel
Lest November kweem he bi uns an un bit Wiehnachten hett he up uns Schoolhoff wohnt. Nu is Wilje up grote Fahrt un entdeckt för uns de Welt. De eerst Postkaart van Wilje hebben wi ook al kregen. Good, dat för de lüttje Wichtels de Corona-Regels neet gellen. Nun kann he sük för uns in de Welt umkieken. Hopentlik stüürt he in de kommende Weken noch mehr Kaarten.
Dezember 2020
Mooie Wiehnachten un dat Allerbest för 2021!
Geschenken
Güstern hett de Klass 3a noch eenmal Geschenken na dat AWO Huus brocht. In de letzde Week hebben se flietig malt, utsneden un kleevt. Un wiel in d`d Spiet disse Johr een Wichtel to Besöök is, hebben se natürelk Wichtelbiller maakt.
Troddelmützen
Wegen Corona kunnen wi neet mitnanner an uns mooi Wiehnachtsboom singen. Wilje Wichtel wohnt disse Johr in de Naberskupp van uns Wiehnachtsboom un was heel andaan van all de rode Troddelmützen. He schenkde all de Kinner een Wilje-Wichtel-Spezial-Lolli.
November 2020
Schule auf Esskurs
Uns Mensa sall mojer worden. De Schölers van de 4a un 4c klütern flietig för de neje Wandbiller. Dat geiht ook mit Afstand heel good un is daarum trotz Corona mögelk. Un wat bit nu klaar is, dat sücht doch all düchtig good ut! Obst un Grööntüch sünd neet bloot gesund. De können ook lüstig utsehn. Daar sust een Wuddel as Rennwagen döör de Mensa un de Peer swingt de Sleev. Wenn disse mal Corona-Tied vöörbi is, denn mutten ji jo de anner Helden van uns gesund Eten unbedingt ankieken
Adventspost
De Klass 3a hett in d`Düütschunnericht Breven schreven. Fell harren se de Idee, een „echten“ Breef to schrieven. So sünd denn de Adventsgröten för de Bewohners van dat AWO Huus entstahn. All de Kaarten sünd ook mooi wiehnachtlich beklevt worden. Een Geschenk is ook noch klütert worden: een Sneeikeerl up een Waskeklammer. Froo Brede un twee Schölerinnen ut de 3a hebben Heern Lange de Breven un Geschenken brocht. Hopentlik kummt disse Överraschung good an.
Süchst du mi?
De düster Jahrstied is d`r. So wurr dat Tied, de Fahrraden up Sekerheid to kontrolleren. Leider sünd vööl Raden neet verkehrsseker. Besünners dat Fehlen van de Lüchten of de Reflektors is in d`Harvst/ Winter een Probleem. Ok an de Bremsen (ofbruukt of heel un dall neet daar) un an de Reifen (platt un sünner Profil) harr de Polizei wat uttosetten.
Oktober 2020
Wunnen
De Nationalparlverwaltung hett „Schnabelbiller“ söcht un de Klasse 3a hett flietig an `t malen wesst. Eerst sünd de Biller (mehr as 230!) in de Tied van de „Treckvögeldagen“utstellt wesst, denn sünd 10 Winners utloost worden. Tim hett een nejen Feernkieker wunnen.
September 2020
Septembermaant is Plattdüütskmaand
Wi maken mit. Wi hebben disse Jahr to`n Bispill een Plattdüütsch AG in Jahrgang 3 un 4.
Well weet dat:
Ik smiet’t rund up’t Dack,
un lang kummt’t weer andaal.
August 2020
Disse Jahr hebben wi an dree Dagen uns dree neje Klassen in uns School begrööt. Froo Brede spölde dat Kind „Heidi“. Heidi wull würkelk arige Saken mit na d`School nehmen: Slickereen of een Mest. Blot Heften, Boken of Stiften weren neet in de Taske. man good, dat uns neje Erstklässlers Heidi helpen kunnen. Achteran sünd de Kinner mit de Mesters in de eerste Unnerichtsstünn gahn. De Ollen kunnen bi Sünnenschien up de Schoolhoff wachten un sück een bietje bi uns in d`d School umkieken.
De Planungen vöör dat neje Schooljahr lopen.
Vööl is anners, vööl is neei. Ok vöör de Schölers, de all in dat leste Schooljahr mit uns so wunnerbar döör de Corona-Olldag gahn sünd.
Nu gifft dat neje Regelungen wegen Corona un bovendeem ok noch anner Tieden un een annern Struktur van de Vörmiddag. Enig Klassen kriegen neje Mesters of neei Facken (to`n Bispill Engelsk).
Vöör de 1. Klasse – Kinner is dat all neei: Mitschölers un Mesters, dat hele Boowark mit all de Kamers un dat Lehren in d`School. Dat is wiss upregend!
Anner Saken sallen sük aber neet ännern: wi willen frünnelk mitnanner umgahn, mitnanner Lachen un Lehren, oll Frünnen treffen un neje Frünnen finnen, eenfach Spaß in d`School hebben.
